Պրոցեսինգային կենտրոնը թվային ենթակառուցվածք է, որի միջոցով իրականացվում են բանկերի բոլոր քարտային գործարքները: Այն, այսպես ասած, կապող օղակ է բանկի, հաճախորդի և վճարային համակարգի (Visa, MasterCard և այլն) միջև:

Սեփական պրոցեսինգային կենտրոնի առկայությունը հնարավորություն է տալիս Բանկի քարտապաններին առաջարկվող ծառայություններում շարունակաբար բարելավումներ և նորարարություններ կատարել:

ԱրՔա համակարգից սեփական պրոցեսինգային կենտրոնի անցումը ծավալուն գործընթաց է, որի իրականացման համար Բանկը համագործակցել է ամերիկյան առաջատար TSYS ընկերության հետ՝ ներդնելով հսկայածավալ ֆինանսական և մարդկային ռեսուրսներ:

Այս պահի դրությամբ տեխնիկական աշխատանքների գերակշիռ մասն ավարտված է, և արդեն վերականգնված են գրեթե բոլոր գործարքները: Գործընթացի ներկայիս կարգավիճակի մանրամասներին կարելի է ծանոթանալ այստեղ։

Այսուհետ Բանկի կողմից թողարկված բոլոր քարտերի գործարքների հաստատումն իրականացվում է անմիջապես Ինեկոբանկի ներքին համակարգից, այնուամենայնիվ բանկը շարունակում է փոխգործակցությունն ինչպես ԱրՔա-ի, այնպես էլ Հայաստանում գործող այլ վճարահաշվարկային համակարգերի հետ: ԱրՔա համակարգի բանկերի սպասարկման կետերում (բանկոմատներ, առևտրի և սպասարկման կետեր) կատարված գործարքների մշակման համար Ինեկոբանկը համագործակցում է ԱրՔա համակարգի հետ, իսկ արտերկրի բանկերի սպասարկման կետերում գործարքների մշակման համար՝ Visa և MasterCard համակարգերի հետ: Տեխնիկական աշխատանքների վերջնական ավարտից հետո Բանկի քարտերը սպասարկվելու են www.arca.am կայքում և բջջային հավելվածում, սակայն այնտեղ այլևս տեսանելի չի լինի Ինեկոբանկի հաճախորդների քարտային մնացորդը, որը մշտապես հասանելի է InecoMobile/Online համակարգերում: